ٹک ٹاکر ڈولی کی ضمانت کی درخواست پر وفاقی دارلحکومت کی مقامی عدالت نے درخواست خارج کرتے ہوئے انہیں پیش ہونے کا حکم جاری کر دیا۔

اسلام آباد کی ڈسٹرکٹ اینڈ سیشن جج عابد سجاد نے مارگلہ ہلز کے جنگل میں آتشزدگی کیس کی سماعت کی۔

ڈولی کی جانب سے عدالت میں عبوری ضمانت میں توسیع کی استدعا کی گئی تاہم وہ خود عدالت میں پیش نہ ہوئیں۔

 فاضل جج نے ملزمہ کے وکیل سے استفسار کیا کہ بتائیں ملزہ کدھر ہیں، عدالتی اہلکار نے تین بار ملزمہ کا نام پکارا لیکن وہ پیش نہیں ہوئیں۔

وکیل نے بتایا کہ وہ یہیں ہیں کیس دوسری عدالت میں منتقل کرنے کی درخواست دائر کر رکھی ہے، وکیل نے عدالت کے روبرو موقف اختیار کیا کہ جو دفعات لگائی گئی ہیں وہ اس عدالت کے دائرہ اختیار میں نہیں آتیں۔

یاد رہے کہ گزشتہ ہفتے مارگلہ کی پہاڑیوں پر آگ کے قریب ویڈیو بنانے والی خاتون ٹک ٹاک ڈولی کے خلاف اسلام آباد کے تھانہ کوہسار میں مقدمات درج کیے گئے تھے۔