عامر لیاقت حسین انتقال کر گئے ہیں اور ان کا جسدِ خاکی اس وقت جناح ہسپتال میں پوسٹ مارٹم کے لیے موجود ہے۔

ان کے انتقال کی خبر پاکستان بھر میں جنگل میں آگ کی طرح پھیل چکی ہے۔ اس حوالے سے مختلف قیاس آرائیاں جاری ہیں کہ آیا ان کی موت کی اصل وجہ کیا ہے۔

وجہ تو پوسٹ مارٹم کی رپورٹ آنے کے بعد ہی پتا چلے گی، لیکن فی الحال ان کے چاہنے والے جوق در جوق ہسپتال ہنچ رہے ہیں جن میں ان کے اہلِ خانہ بھی شامل ہیں۔

عامر لیاقت کی بیٹی دعا عامر اور پہلی بیوی بشریٰ اقبال بھی ہسپتال پہنچیں، جہاں کیمرے کی آنکھ نے انتہائی جذباتی مناظر قید کئے۔

خیال رہے کہ عامر لیاقت حسین کو ان کے ملازمین نے نجی اسپتال منتقل کیا تھا، جہاں ڈاکٹرز نے معائنے کے بعد انتقال کی تصدیق کی۔

عامر لیاقت اپنے آبائی گھر خداداد کالونی میں موجود تھے، جہاں ملازمین نے انہیں بے ہوش حالت میں بستر پر پڑا پایا۔

عامر لیاقت کے ڈرائیور جاوید نے 15 پر اطلاع دی تھی۔

ملازم جاوید کے بیان کے مطابق گزشتہ شب عامر لیاقت کے سینے میں تکلیف، لیکن انہوں نے اسپتال جانے سے انکار کردیا تھا اور ان کے کمرے سے چیخنے کی آواز بھی سنائی دی تھی۔

پاکستان کے معروف میزبان اور سیاسی شخصیت عامر لیاقت 5 جولائی 1971 کو پیدا ہوئے، وہ 2002 سے 2007 تک قومی اسمبلی کے ممبر رہے اور سابق صدر پرویز مشرف دور میں وزیرِ مملکت بھی رہے، 2018 میں وہ پی ٹی آئی کے ٹکٹ پر رکن قومی اسمبلی منتخب ہوئے۔

عامر لیاقت حسین نے 3 شادیاں کیں، اُن کی ازدواج میں ڈاکٹر سیدہ بشریٰ اقبال، سیدہ طوبیٰ انور اور دانیہ ملک شامل ہیں جبکہ دو بچے دعا عامر اور احمد عامر ہیں۔