پاکستان شوبز انڈسٹری کی اداکارہ و معروف میزبان عفت عمر نے پاکستان تحریکِ انصاف (پی ٹی آئی) کے چیئرمین اور سابق وزیرِ اعظم عمران خان پر ایک بار پھر کڑی تنقید کی ہے۔

حال ہی میں اداکارہ نے سوشل میڈیا کی فوٹو اور ویڈیو شیئرنگ ایپ انسٹا گرام پر ایک اسٹوری پوسٹ کی جس میں انہوں نے چیئرمین پی ٹی آئی کی ٹیلی تھون مہم پر تنقید کی۔

شیئر کی گئی پوسٹ میں عفت عمر نے سوال کیا کہ ’ایک گھنٹے میں اربوں روپے اکٹھے کرسکتے ہیں تو 4 سالہ دورِ حکومت میں 25 ارب ڈالر قرضہ کیوں لیا تھا‘۔

معروف میزبان نے سماجی رابطے کی ویب سائٹ ٹوئٹر پر بھی ایک ویڈیو جاری کی جس میں انہوں نے میڈیا سے گفتگو کے دوران عمران خان پر تنقید کی اور کہا کہ “عمران خان کا بیانیہ انسان دوست نہیں ہے”۔

خان صاحب کا بیانیہ انسان دوست نہیں ہے یہ ہمیں ترقی کی جانب نہیں لے کر جائے گا، ان کے پاس باتوں علاوہ کچھ نہیں ہے عملی طور پر وہ بہت کم ضرف آدمی ہیں، https://www.bolnews.com/urdu/entertainment/2022/08/823419/amp/

— Iffat Omar Official (@OmarIffat) August 30, 2022

انہوں نے کہا کہ “یہ ہمیں ترقی کی جانب نہیں لے کر جائے گا، ان کے پاس باتوں کے علاوہ کچھ نہیں ہے، عملی طور پر وہ بہت کم ظرف آدمی ہیں”۔

ان کا کہنا تھا کہ “میں پہلے عمران خان کو بہت فولو کرتی تھی لیکن پھر مجھے محسوس ہوا وہ ایک کم ظرف انسان ہیں ان میں گریس نہیں”۔

عفت عمر نے مزید کہا کہ “پہلے کسی مشکل پڑنے پر سارے پاکستانی اکٹھے ہوجاتے تھے لیکن اب عمران خان پہلے لیڈر ہیں جنہوں نے اتنی تقسیم کردی ہے کہ لوگ اب نفرت میں آکر اپنے پاکستانی سیلاب متاثرین کی مدد اس لیے نہیں کر رہے کہ مسلم لیگ (ن ) اور پی پی کامیاب نہ ہوجائے”۔

واضح رہے کہ یہ پہلی بار نہیں ہے کہ اداکارہ نے عمران خان پر تنقید کی ہو، وہ اس سے قبل بھی چیئرمین پی ٹی آئی کو کڑی تنقید کا نشانہ بنا چُکی ہیں۔