بالی ووڈ فلم انڈسٹری کے مشہور و معروف اداکار سیف علی خان نے سوشل میڈیا استعمال نہ کرنے کی وجہ بتادی ہے۔

حال ہی میں اپنے دیے گئے ایک انٹرویو میں اداکار سیف علی خان کا کہنا تھا کہ میں بہت فوٹوگرافیک پرسن ہوں، مجھے یادیں جمع کرنے کا بہت شوق ہے اس لیے میں ہر چھوٹی سے چھوٹی چیز کی تصاویر جمع کرتا رہتا ہوں، میرے پاس تصویروں کا ڈھیر ہے۔

ان کا کہنا تھا کہ اب اکاؤنٹ رکھوں گا تو انہیں شیئر بھی کروں گا لیکن لوگ کہتے ہیں یہ شیئر نہ کرو، وہ شیئر نہ کرو ایسے میں مجھے سوشل میڈیا اکاؤنٹ چلانے کے لیے ایک مینیجر رکھنا پڑ جائے گا اور کچھ بھی شیئر کرنے سے پہلے اس سے اجازت لینا پڑے گی، جو کہ غلط ہے۔

انہوں نے کہا کہ اس لیے سوشل میڈیا اکاؤنٹ رکھنے کا کوئی فائدہ نہیں ہے، جب میں کچھ شیئر ہی نہیں کرسکتا، میں اس میں نہیں پھنسنا چاہتا۔

یہ بھی پڑھیں: سیف علی خان کے صاحبزادے بالی ووڈ میں جلوے بکھیرنے کو تیار

اداکار سیف علی خان کا مزید کہنا تھا کہ صرف ایک چیز انہیں سوشل میڈیا اکاؤنٹ رکھنے پر مجبور کرسکتی ہے اور وہ ہے ’پیسہ‘۔