پاکستان شوبز انڈسٹری کے مشہور و معروف اداکار وہاج علی نے اپنی زندگی سے متعلق اہم انکشاف کردیا ہے۔

حال ہی میں اپنے دیے گئے ایک انٹرویو میں اداکار وہاج علی کا کہنا تھا کہ وہ اپنے ماں باپ کے اکلوتے بچے ہیں، وہ بچپن میں بہت شرارتی تھے اور ہمیشہ کھیل کود میں وقت بیتاتے تھے۔

انہوں نے بتایا کہ میں لاہور پیدا ہوا لیکن میں جب کام کے سلسلے میں کراچی شہر آتا ہوں تو مجھے اپنے گھر والوں کی بہت یاد آتی ہے۔

ان کا کہنا تھا کہ میرے والدین دونوں سرکاری افسر تھے، میرے والد سول سروسز میں تھے جبکہ والدہ گورمنٹ گرلز کالج میں پڑھاتی تھیں۔

وہاج علی نے کہا کہ مجھے ڈرائنگ کا بہت شوق تھا اور لکھنے کا بھی جبکہ میرے والد کو گانے سننے کا بہت شوق تھا وہ صبح ہی صبح محمد رفیع کے گانے لگا کر سنتے اور گاتے تھے۔

انہوں نے بتایا کہ میرے والد کا 2018 میں انتقال ہوا، وہ کئی عرصے سے دل کی بیماری میں مبتلا تھے، میرے گھر والے مجھے بتاتے نہیں تھے کہ گھر میں کیا مسائل موجود ہیں کیونکہ میں اکلوتا تھا وہ مجھے پریشان دیکھنا نہیں چاہتے تھے۔

ان کا کہنا تھا کہ میں جب لاہور گھر واپس آیا تو وہ ایسا لمحہ تھا جب میری بیٹی پیدا ہونے والی تھی، میں بہت خوش تھا کہ میں اب اکیلا نہیں ہوں گا بلکہ جب واپس کراچی آؤں گا تو میرے ساتھ میری بیٹی ہوگی۔

وہاج علی نے کہا کہ اس وقت والدہ نے مجھے بتایا کہ والد کی طبیعت ٹھیک نہیں ہے، میں جب والد کو لے کر اسپتال گیا تھا تو وہاں معلوم ہوا کہ انہیں پھیپڑوں کا انفیکشن ہے مگر والد مجھے کہتے تھے کہ میں بالکل ٹھیک محسوس کر رہا ہوں ڈرنے کی بات نہیں ہے۔

انہوں نے بتایا کہ میں پھر بھی والد کو چیک اپ کے لیے اسپتال لے گیا، جب واپس آیا تو فیس بک پر والد کی دل کی بیماری سے متعلق علامات دیکھ رہا تھا تو معلوم ہوا کہ چھ سات علامات والد کو محسوس ہو رہی ہیں اور جب رپورٹس سامنے آئیں تو معلوم ہوا کہ انہیں اکیوٹ فیلئر ہے یعنی اچانک دل کا دھڑکنا بند ہوجانا۔

ان کا کہنا تھا کہ میں اپنے والد کے ساتھ تین دن اسپتال میں رہا اور چوتھے دن حالات خراب ہوگئے، ان کا انتقال ہوا اور جب انہیں دفنایا تو اس دوران بارش ہوگئی تھی۔

پاکستان شوبز انڈسٹری کے مشہور و معروف اداکار وہاج علی نے مزید کہا کہ والد کی وفات کے تین دن بعد میری بیٹی پیدا ہوئی تھی، اُس وقت مجھے سمجھ نہیں آرہا تھا کہ میں خوشی مناؤں یا غم۔