بالی ووڈ فلم انڈسٹری کی مشہور و معروف اداکارہ کرینہ کپور نے مرد اداکاروں پر کڑی تنقید کی ہے۔

حال ہی میں اپنے دیے گئے ایک انٹرویو میں اداکارہ کرینہ کپور کا کہنا تھا کہ اصل چیز ٹیلنٹ اور کام ہوتا ہے، اکثر اداکار فلموں میں شرٹ اتار کر دکھاتے ہیں۔ لوگ ان چیزوں سے نہیں اداکاری سے متاثر ہوتے ہیں۔

انہوں نے کہا کہ اس طرح کے سین کروانے والے اداکاروں کو دیکھ کر دل چاہتا ہے کہ ان سے کہوں کہ پہلے شرٹ تو پہنو، ایسے تو تمہاری طرف دیکھا بھی نہیں جا رہا۔

اداکارہ کرینہ کپور نے فلم اینمل میں اپنے کزن رنبیر کپور اور اداکار بوبی دیول کی تعریف کرتے ہوئے کہا کہ بوبی دیول نے طویل عرصے کی جدوجہد کے بعد اپنے اچھے کام سے خود کو سپر اسٹار کا درجہ دلوایا۔ اسٹار بننے کے لیے اچھا ایکٹر ہونا ضروری ہے۔