پاکستان مخالف بیانئے پر مبنی بالی ووڈ اسٹار ہریتک روشن اور دیپیکا پڈوکون کی ‘فائٹر’ 25 جنوری کو سینما گھروں میں ریلیز ہوئی، سدھارتھ آنند کی ہدایت کاری میں بننے والی فلم نے باکس آفس پر شاندار آغاز کیا۔

غیر ملکی خبر رساں ادارے کی رپورٹ کے مطابق ‘فائٹر’ نے باکس آفس پر اچھی شروعات کی ہے جبکہ دیپیکا اور ہریتک کی نئی آن اسکرین جوڑی سے لے کر ہوائی اسٹنٹ تک، ہر چیز نے مداحوں پر جادو کر دیا ہے۔

رپورٹ میں بتایا گیا ہے کہ فائٹر نے ابتدائی طور پر 22 کروڑ روپے کا بزنس کیا ہے جو کہ ایک اچھی شروعات ہے تاہم امکان ظاہر کیا جارہا ہے کہ رواں ہفتے کے اختتام تک کلیکشن میں اضافہ دیکھا جاسکتا ہے۔

 اس فلم کی کامیابی باکس آفس کی مجموعی کارکردگی کا تعین کرنے میں اہم کردار ادا کر سکتی ہے۔

ایک دوسری رپورٹ کے مطابق ابتدائی تخمینوں سے پتہ چلتا ہے کہ فائٹر نے تمام زبانوں میں 22 کروڑ روپے کمائے ہیں جو کہ لاک ڈاؤن کے بعد اداکار کی ریلیز ہونے والی پہلی بہترین فلم ثابت ہوئی ہے۔