پاکستان شوبز انڈسٹری کی معروف و سینئر اداکارہ نادیہ افگن نے کہا ہے کہ ذہنی صحت ہر کسی کا مسئلہ ہے ہمیں ایسے مسائل کو سمجھنے کی ضرورت ہے۔

حال ہی میں معروف و سینئر اداکارہ نادیہ افگن نے سوشل میڈیا کی فوٹو اینڈ ویڈیو شیئرنگ ایپ انسٹاگرام پر اپنے جاری کردہ ایک ویڈیو بیان میں کہا کہ ستمبر خودکشی سے بچاؤ کی تدابیر کا عالمی مہینہ ہے، اس لیے اس مہینے خصوصی طور پر اپنے ارد گرد ڈپریشن، اضطراب اور ذہنی مسائل کے شکار افراد پر نظر رکھیں۔

انہوں نے کہا کہ سماج میں بہت سارے لوگ ایسے ہیں جو کئی مسائل سے گزر رہے ہیں، انہیں اپنی ذہنی صحت سے متعلق بھی کچھ علم نہیں، ایسے افراد پر نظر رکھنے اور ان کی بات سننے کی ضرورت ہے۔

ان کا کہنا تھا کہ ذہنی مسائل کے شکار افراد کی باتوں پر بُرا منانے کے بجائے ان کی باتوں کو آرام سے سنیں اور پھر ان کی تشنگی اور ذہنی حالت کو دیکھتے ہوئے ان کی مدد کریں۔

نادیہ افگن نے کہا کہ ذہنی مسائل کے شکار افراد، دوستوں اور اہل خانہ کو دیکھ کر ان سے بات کریں، انہیں یقین دلائیں کہ وہ تنہا نہیں ہیں، آپ کا ایک لفظ بھی انہیں ہمت دے سکتا ہے۔

اداکارہ کا کہنا تھا کہ ذہنی صحت ہر کسی کا مسئلہ ہے اور ہم میں سے ہر کسی کی ذہنی صحت بلواسطہ یا بلاواسطہ متاثر ہو رہی ہے، اس لیے ایسے مسائل کو سمجھنے اور ایک دوسرے کا سہارا بننے کی ضرورت ہے۔

انہوں نے مزید کہا کہ ذہنی مسائل کے شکار افراد کو ایسی محفوظ جگہ فراہم کرنے کی ضرورت ہے، جہاں وہ اپنے خوف سے بالاتر ہو کر اپنے جذبات کا اظہار کر سکیں اور اپنے مسائل بیان کر سکیں۔