پاکستانی اداکاروں مشی خان اور منشا پاشا نے بھارت کے معروف کہانی کار اور نغمہ نگار جاوید اختر کے متنازع بیان کا کرارا جواب دے دیا۔

اداکارہ مشی خان نے جاوید اختر کو مخاطب کرتے ہوئے کہا کہ آپ کی سوچ جان کر افسوس ہوا، جب آپ پاکستان آئے تھے تو آپ کو کس قدر عزت دی گئی، بڑے بڑے فنکار آپ کے قدموں میں بیٹھ گئے تھے۔

اداکارہ کا کہنا تھا کہ آج آپ کی اصلیت سامنے آگئی، آپ سخت دل اور چھوٹی سوچ کے مالک ہیں۔

مزید پڑھیں: بھارت میں پاکستانی اداکاروں کے سوشل میڈیا اکاؤنٹس بلاک

مشی خان نے مزید کہا کہ پاکستانی فنکاروں کو بھارت میں کام کرنے میں کوئی دلچسپی نہیں ہے، اگر کوئی پابندی لگائے تو لگائے، ہمیں اس سے کوئی فرق نہیں پڑتا۔

دوسری جانب اداکارہ منشا پاشا نے بھی جاوید اختر کو جواب دیتے ہوئے کہا کہ سچ تو یہ ہے کہ قصور ہمارا ہی ہے، ہمیں اپنی عزت نفس کا احترام کرنا ضروری ہے۔

واضح رہے کہ جاوید اختر نے اپنے ایک انٹرویو میں پاکستانی فنکاروں پر پابندی کی حمایت کرتے ہوئے کہا تھا کہ پاکستان نے کبھی بھارتی فنکاروں کو اہمیت نہیں دی حالانکہ نصرت فتح علی خان، غلام علی اور دیگر فنکاروں کو بھارت میں بھرپور پذیرائی ملی تھی۔