پنجابی فلم انڈسٹری کے معروف گلوکار و اداکار دلجیت دوسانجھ کی آنے والی فلم ’سردار جی 3‘ کا نیا گانا ’سوہنی لگدی‘ ریلیز کر دیا گیا ہے، جس میں پاکستانی اداکارہ ہانیہ عامر بھی جلوہ گر ہیں۔

دلجیت اور ہانیہ نے ’سوہنی لگدی‘ کی آفیشل ویڈیو اپنے انسٹاگرام ہینڈلز پر شیئر کی، جسے دیکھتے ہی دیکھتے لاکھوں ویوز اور لائکس مل چکے ہیں۔ گانے میں دونوں فنکاروں کی کیمسٹری کو مداحوں کی جانب سے بےحد سراہا جا رہا ہے۔

گانے کی ریلیز کے بعد سوشل میڈیا پر “ہانیہ عامر” اور “سوہنی لگدی” جیسے ہیش ٹیگز ٹرینڈ کرنے لگے جبکہ مداحوں نے تبصروں میں ہانیہ کی پرفارمنس کو “دلکش” اور “فریش انرجی” قرار دیا۔

واضح رہے کہ فلم ’سردار جی 3‘ کو 27 جون کو بھارت، پاکستان اور دیگر ممالک میں ریلیز کیا جائے گا۔ تاہم، پاکستانی اداکارہ کو فلم میں کاسٹ کرنے پر دلجیت دوسانجھ کو بھارت میں کچھ حلقوں کی طرف سے تنقید کا سامنا بھی ہے۔

حالیہ پاک-بھارت کشیدگی کے بعد بھارتی فلم انڈسٹری میں ایک مرتبہ پھر پاکستانی فنکاروں پر کام کرنے کی پابندی عائد کر دی گئی ہے، اس کے باوجود ہانیہ عامر کی بھارتی پنجابی فلم میں موجودگی مداحوں کے لیے ایک خوشگوار حیرت بن کر سامنے آئی ہے۔