جہاں ایک طرف طبی ماہرین کی جانب سے رمضان کے دوران مرغن غذاؤں اور زیادہ کھانے سے پرہیز تجویز کیا جاتا ہے وہیں گرم پانی سے روزہ افطار کرنے کے بے شمار فوائد بھی گنوائے جاتے ہیں۔

سحری کے بعد تقریباً 15 سے 16 گھنٹوں کے بعد جب افطار کا وقت آتا ہے تو یہ نہایت قیمتی وقت ہوتا ہے اس دوران ہم کیا کھا پی رہے ہیں، گھنٹوں کی بھوک کے بعد اگر پہلا گلاس نیم گرم پانی کا پی لیا جائے تو افطار کے بعد پیش آنے والی کافی شکایات سے نجات مل سکتی ہے۔

نیم گرم پانی سے روزہ افطار کرنے کی صورت میں وزن میں کمی سے لے کر دل، گردوں اور پھیپھڑوں کی صحت میں اضافہ ہوتا ہے۔

صرف یہی نہیں بلکہ جِلد صاف اور خوبصورت ہوتی ہے۔ انسان خود کو چاق و چوبند اور توانا محسوس کرتا ہے۔ طبیعت کا بوجھل پن منٹوں میں غائب ہو جاتا ہے ۔

نیم گرم پانی سے روزہ افطار کرنے کی صورت میں انسانی جسم کے اندرونی اعضاء فوراً فعال ہو جاتے ہیں اور جسم میں موجود مضر صحت مادوں کو بھی خارج ہونے میں مدد ملتی ہے۔

رمضان کے دوران اکثر اوقات نظام ہاضمہ خراب رہتا ہے، اس کی وجہ سحری اور افطار کے دوران پانی کا کم استعمال اور مضر صحت غذاؤں کا زیادہ استعمال ہوتا ہے، نیم گرم پانی پینے کے نتیجے میں بڑی اور چھوٹی آنتوں کی کارکردگی بہتر ہوجاتی ہے۔ قبض سے بھی نجات ملتی ہے۔

 افطار کے دوران نیم گرم پانی پینے سے غذا آسانی سے ہضم بھی ہو جاتی ہے۔