عالمی ادارہ صحت کا کہنا ہے کہ اقوام متحدہ کی جانب سے غریب ممالک کو کورونا ویکسین کی اب تک ایک ارب خوراکیں بھیجی گئیں ہیں۔

اتوار کو ایک بیان میں اقوام متحدہ کی صحت سے متعلقہ ایجنسی کا کہنا تھا کہ ہفتے کے روز روانڈا بھیجی جانے والی 11 لاکھ کورونا ویکسین کی خوراکیں، کوویکس پروگرام کے تحت سپلائی کی جانے والی ایک ارب خوراکوں میں شامل ہیں۔

عالمی ادارہ صحت عرصے سے ویکسین کی غیر منصفانہ تقسیم پر تنقید کر رہا ہے اور ویکسین سازوں اور دیگر ممالک سے درخواست کر رہا ہے کہ وہ کوویکس کو ترجیح دیں۔

ادارے کے مطابق 194 ممبر ممالک میں سے 36 مملک میں ویکسینیشن کی شرح 10 فی صد سے کم ہے جبکہ 88 ممالک میں یہ شرح 40 فی صد سے کم ہے۔

عالمی ادارہ صحت نے جاری ایک بیان میں کہا کہ یہ پروگرام اب تک 144 ممالک تک ڈیلیوریز کر چکا ہے لیکن جو کام ہو چکا ہے یہ صرف باقی رہ جانے والے کام کی یاد دیانی کراتا ہے۔

بیان میں مزید کہا گیا کہ کوویکس کے عزائم کو امیر ممالک کی جانب سے کی جانے والی ذخیرہ اندوزی کی وجہ سے سمجھوتہ کرنا پڑا۔ تباہ کن پھیلاؤ کی وجہ سے سرحدیں اور سپلائی دونوں بند ہوگئیں۔

بیان میں یہ بھی کہا گیا کہ لائسنز، ٹیکنالوجی اور ادویاء ساز کمپنیوں کی معلومات کا اشتراک نہ ہونے کا مطلب تھا کہ دوا سازی کی صلاحیت بے کار گئی۔

دسمبر کے آخر میں عالمی ادارہ صحت کے ڈائریکٹر جنرل نے سب پر زور دیا تھا کہ نئے سال کا عہد کریں کہ جولائی کے شروع تک ممالک اپنی 70 فی صد تک عوام کو ویکسین لگائیں گے۔