صحت بخش غذاؤں کی فہرست میں جہاں سبزیاں، پھل، خشک میوہ جات شامل ہیں وہی مختلف بیجوں کو بھی نہایت اہم مقام حاصل ہے۔ یہاں تک کہ بعض بیجوں کو توسپر فوڈ کا درجہ دیاجاچکا ہے۔

ان ہی بیجوں میں چند بیج ایسے ہیں جو اومیگا تھری فیٹی ایسڈ سے بھرپور ہیں اومیگا 3 فیٹی ایسڈ ایک طرح کی صحت مند چکنائی ہے جو دل کی صحت کے لیے نہایت ضروری ہے اورساتھ ہی یہ ٹرائگلیسرائڈزکی سطح کو بھی کم کرنے میں معاون ثابت ہوتی ہے۔

اومیگا تھری فیٹی ایسڈ دماغ اور اعصابی نظام کے افعال کی بہتر انجام دہی میں اہم کردار ادا کرتا ہے ہیں۔ یہ بات جاننا بے حد ضروری ہے کہ جسم براہ راست اومیگا تھری فیٹی ایسڈ نہیں بنا سکتا۔ لہذا خوراک کے ذریعے اومیگا 3 فیٹی ایسڈ کو حاصل کیا جاتا ہے۔ یہاں ان بیجوں کا ذکر کیا جارہا ہے جواومیگا تھری فیٹی ایسڈ سے بھرپور ہیں۔

تخم بالنگا

تخم بالنگا کا شمارصحت بخش بیجوں میں کیا جاتا ہے جبکہ اسے سپر فوڈ کا درجہ بھی حاصل ہے۔ یہ بیج اومیگا 3 فیٹی ایسڈز، فائبر اور اینٹی آکسیڈنٹس سے بھرے ہوتے ہیں۔ یہاں تک کہ ان بیجوں میں سالمن سے زیادہ اومیگا 3 فیٹی ایسڈ پایا جاتا ہے۔

ان بیجوں کا استعمال خون میں ٹرائگلیسرائڈز کو کم کرنے اور اچھے ایچ ڈی ایل کولیسٹرول کو بڑھانے میں مددگار ثابت ہوتا ہے تاکہ امراض قلب، ذیابیطس اور موٹاپے کے خطرے کو کم کیا جا سکے۔

السی کے بیج

السی کے بیج  جسے فلیکس سیڈ بھی کہاجاتا ہے اومیگا 3 فیٹی ایسڈز، فائبر، پروٹین میگنیشیم اور ایسٹروجن کے حصول کا بہترین ذریعہ ہیں۔ یہ بلڈ پریشر اور کولیسٹرول کو نمایاں طور پر کم کرنے میں مدد فراہم کرتے ہیں۔ ان میں فائبر کی زیادہ مقدار صحت مند وزن کو برقرار رکھنے میں معاون ثابت ہوتی ہے۔

یہ نظام ہاضمہ کے کچھ مسائل جیسے قبض کو دور کرنے میں بھی مدد کرتے ہیں۔ السی کے بیجوں میں اینٹی کینسر مرکبات بھی پائے جاتے ہیں جو چھاتی کے کینسر سے تحفظ فراہم کرتے ہیں۔