چھوٹے یا بڑے بہن بھائی تقریباً ہر گھر اور خاندان میں موجود ہوتے ہیں جن کے ساتھ اکثر بہت اچھا وقت گزرتا ہے تاہم ان کی زیادہ تعداد آپ کی ذہنی صحت کو متاثر کرسکتی ہے یہ بات ایک تحقیق میں سامنے آئی ہے۔

جرنل آف فیملی ایشوز میں شائع ہونے والی ایک نئی تحقیق کے مطابق کسی شخص کے جتنے زیادہ بہن بھائی ہوتے ہیں، ان کی ذہنی صحت اتنی ہی کمزور ہوتی ہے۔ کیونکہ بہن بھائی آپ کے بہترین دوست بھی ہوسکتے ہیں اور بدترین خواب بھی۔

امریکہ اور چین کی ایک تحقیقی ٹیم نے آٹھویں جماعت کے ہزاروں طالب علموں کے ڈیٹا کا تجزیہ کیا اور ان کی ذہنی صحت کا جائزہ لیا تاکہ اس بات کا تعین کیا جا سکے کہ بہن بھائیوں کا ان کی صحت پر کیا اثر پڑتا ہے۔

اس تحقیق کے مرکزی مصنف ڈوگ ڈاؤنی کا کہنا ہے کہ جب کسی بھی فرد کے تمام پہلو اور شواہد کا جائزہ لیا جاتا ہے تو بہن بھائیوں کا اثر دماغی صحت پر مثبت سے زیادہ منفی ہوتا ہے۔

امریکی اعداد و شمار کے مطابق، ایسے افراد کی ذہنی صحت سب سے زیادہ خراب تھی جن کے بڑے یا چھوٹے بہن بھائیوں میں عمر کا فرق بہت کم تھا۔ایسا نہیں ان کے درمیان چھوٹی موٹی لڑائی یا تنازعہ خراب ذہنی صحت کا باعث بنتا ہے بلکہ اس کی وجہ وسائل کی کمی ہے۔

اگر کوئی بچہ اپنے والدین کی واحد اولاد ہے تو والدین کے پاس جو بھی وسائل ہیں وہ اسی کے لیے استعمال ہوں گے جبکہ زیادہ بہن بھائیوں ہونے کی صورت میں ہر بچے کو والدین کی طرف سے کم وسائل اور توجہ ملتی ہے جس کا اثر ان کی ذہنی صحت پر پڑ سکتا ہے۔

نتائج کے مطابق ایسے تمام خاندان جن میں بہن بھائی کم یا نہیں تھے اور وہ  اقتصادی طور پر مستحکم تھے ان میں بچوں کی ذہنی صحت بہترین تھی۔ تاہم، دیگر مطالعات سے پتہ چلتا ہے کہ زیادہ بہن بھائی ہونے کی وجہ سے بچوں میں بہتر سماجی مہارت پائی جاتی ہے اور ان میں طلاق کا امکان بھی کم ہوتا ہے ۔