سندھ کے شہرلاڑکانہ کےچانڈکا میڈیکل کالج ہاسٹل میں 16 ستمبر کو جاں بحق ہونے والی طالبہ نمرتا کی حتمی پوسٹ مارٹم رپورٹ سامنے آ گئی۔

تفصیلات کےمطابق میڈیکل کی طالبہ نمرتا کماری کی حتمی پوسٹ مارٹم رپورٹ سامنے آگئی ہے جس کے مطابق مقتولہ کو زیادتی کے بعد قتل کیا گیا تھا۔

حتمی پوسٹ مارٹم رپورٹ میں یہ بات بھی سامنے آئی کہ نمرتا کماری کو قتل کرنے سے پہلے جنسی زیادتی کا نشانہ بنایا گیا جبکہ موت کی وجہ دم گھٹنا ہے۔

رپورٹ کے مطابق پوسٹ مارٹم میں یہ بھی سامنے آیاکہ ڈی این اے ٹیسٹ میں مرد کے ڈی این اے پروفائل کی موجودگی کی تصدیق ہوئی ہے جو لاش کے کپڑوں سے بھی ظاہرہے، مرد کے ڈی این اے کی باقیات سے ظاہر ہے کہ نمرتا سے زیادتی کی گئی۔

میڈیکو لیگل آفیسر ڈاکٹر امرتا کی جانب سے جاری کردہ حتمی پوسٹ مارٹم رپورٹ بھی مبہم ہے جو کہ خودکشی یا قتل کا صحیح تعین نہیں کرسکی ہے۔

پوسٹ مارٹم کی رپورٹ کے مطابق نمرتا کی موت دم گھٹنے کی وجہ سے ہوئی کیونکہ نمرتا کی گردن پر پھندے کے نشانات تھے۔

 میڈیکو لیگل آفیسر ڈاکٹر امرتاکی جانب سے مزیدکہا گیاکہ اس طرح کی علامتیں یا تو گلا گھونٹنے پر یا پھانسی پر ظاہر ہوتی ہیں۔