وزیراعظم عمران خان نے پاکستان کو ایک فلاحی مملکت بنانے کے لئے نئے سال میں اہم اقدامات کرنے کا عزم ظاہر کیا ہے۔

تفصیلات کے مطابق وزیراعظم عمران خان  نے ایک  تقریب سے خطاب کرتے ہوئے کہا کہ گزشتہ سال کے دوران معیشت مستحکم ہوئی ہے اور اب تمام اقتصادی اشاریے مثبت رجحان ظاہر کر رہے ہیں۔

وزیراعظم نے کہا کہ موجودہ سال کے دوران سیاحت اور تعمیری شعبوں کو خصوصی اہمیت دی جائیگی جس سے معیشت کو فروغ حاصل ہو گا۔

عمران خان نے  یہ بھی کہا کہ اب حکومت ملک میں تمام دستیاب وسائل بروئے کار لانے اور لوگوں کو زیادہ سے زیادہ سہولتیں فراہم کرنے پر توجہ دے گی۔

وزیراعظم کا کہنا تھا کہ کچی آبادیوں میں لنگر شروع ہو گا جبکہ ضرورت مندوں کے لئے صحت بیمہ کارڈز اور پناہ گاہیں کھولی جا چکی ہیں۔

ہمارا ٹارگٹ پاکستان کا سسٹم ٹھیک کر کے میرٹ کو لانا ہے، وزیراعظم

عمران خان  کا یہ بھی کہنا تھا کہ حکومت یوٹیلٹی سٹورز میں ارزاں نرخوں پر اشیائے ضروریہ کی فراہمی یقینی بنائے گی اور انصاف کارڈز متعارف کرائے گی۔

عمران خان نے ریاست مدینہ کی طرز پر پاکستان کی تعمیر کے اپنے ویژن کو اجاگر کرتے ہوئے کہا کہ پاکستان تحریک انصاف کی حکومت کے دوران انسانیت، قانون کی حکمرانی اور تعلیم پر توجہ دی جائیگی۔

تقریب سے خطاب کرتے ہوئے عمران خان نے کہا کہ ٹیکنالوجی اور تحقیق کو تعلیمی نظام میں مناسب اہمیت دی جانی چاہئے تاکہ موجودہ جدید دور میں حقیقی ترقی حاصل کی جا سکے۔

اس موقع پر عمران خان نے میرٹ پر عملدرآمد اور اداروں کے استحکام کے ذریعے نظام کو درست کرنے کے اپنے عزم کا اعادہ کیا۔

وزیراعظم عمران خان نے مزید کہا کہ تعلیم کے شعبے میں درپیش مالی رکاوٹیں عارضی ہیں، پچھلا سال بڑا مشکل سال تھا ہماری عوام کو مشکل وقت سے گزرنا پڑا لیکن اب معیشت استحکام کی جانب گامزن ہے اور ہم ملک کو مستحکم کرنے میں کامیاب ہو گئے ہیں، 2020 ترقی اور خوشحالی کا سال ہے۔