معروف نعت خواں جنید جمشید کے ماضی میں دیے گئےایک انٹرویو کی ویڈیو سوشل میڈیا پر خوب وائر ل ہوگئی جس میں اُنہوں نے بچوں کی تربیت اور پرورش کے حوالے سے اپنی گہری رائے کا اظہار کیا ہے۔

جنید جمشید نے یہ انٹرویو پاکستان کی معروف اداکارہ و میزبان ثانیہ سعید کو دیا تھا۔جس کے دوران انہوں نے کہا تھا کہ ’ہم اپنے بچپن میں شرارتی ضرور تھے لیکن بدتمیز نہیں تھے۔‘

اولاد کی پرورش پر بات کرتے ہوئے جنید جمشید کا کہنا تھا کہ ’میری سوچ یہ ہے کہ اولاد شرارتی ہوجائے لیکن بدتمیز نہ ہو اور والدین کو اِس بات کا ضرور خیال رکھنا چاہیے کہ اُن کی اولاد کو چھوٹے بڑے کی تمیز ہو اور اولاد کو یہ معلوم ہو کہ اپنے والدین سے کس طرح بات کرنی ہے۔‘

مرحوم جنید جمشید کا اپنے انٹرویو میں کہنا تھا کہ ’ہم نے کبھی اپنے والدین کے آگے آواز اُونچی نہیں کی اور نا ہی ساری زندگی والد کی آنکھوں میں آنکھیں ڈال کر بات کی۔‘

انہوں نے کہا کہ ’ہماری تعلیمات میں ہے کہ والدین چاہے جس عُمر میں پہنچ جائیں وہ اپنی اولاد کو کِھلانے میں خوشی محسوس کرتے ہیں لیکن اگر ہم اپنی تعلیمات کو چھوڑ کر دوسروں کی ثقافت کو اپنائیں گے تو اِس سے ہمارا معاشرہ تباہ ہوجائے گا۔