ملک بھر میں رمضان المبارک کے پہلے روزے کیلئے سحری کااہتمام کیاگیا۔ کوروناو ائرس کے پھیلاو کو روکنے کیلئےملک بھر میں جاری لاک ڈاون کے باعث رمضان المبارک میں ہونےوالی پہلی سحری کی رونقیں ماند پڑگئیں۔

تفصیلات کے مطابق کراچی اور حیدر آباد سمیت سندھ بھر میں مکمل لاک ڈاؤن کے باعث دکانیں بند رہیں۔

وفاقی دارالحکومت اسلام آباد میں پہلی سحری پر لاک ڈاؤن کے باعث زیادہ تر ہوٹل بندرہے ، چند کھلے ہوٹلز سے صرف پارسل کی اجازت تھی۔

لاہور میں بھی شہر کے تمام ہوٹل بندرہے تاہم تندور کھولنے کی اجازت تھی، وہاں بھی صرف پارسل کا انتظام تھا، اس کے علاوہ شہرمیں دودھ دہی کی دکانیں بھی کھلی رہیں ۔

کراچی میں سندھ حکومت کی جانب سے سخت لاک ڈاؤن کی وجہ سے تمام ہوٹلز بند تھے ، دودھ دہی کی دکانیں بھی بند رہیں۔

سندھ کے بیشترشہروں حیدرآباد ،سکھراورنوابشاہ میں بھی پہلی سحری پر سڑکوں پر سناٹا چھایا رہا ، حکومتی احکامات کے پیش نظر سخت لاک ڈاؤن کیا گیا کوئی دکان اور ہوٹل نہیں کھولاگیا۔

پشاور میں بیشتر ہوٹلز اور دکانیں بند رہیں، چند ہوٹل کھولے گئے تو پولیس نے بند کروادیئے ، جبکہ شہرمیں دودھ اور دہی کی دکانیں کی کھلی رہیں۔

کوئٹہ میں بھی بیشتر دکانیں بند رہیں چند کھلنے والے ہوٹلز پرصرف پارسل کا انتظام دیکھنے میں آیا، دودھ دہی کی دکانیں بھی کھولی گئیں۔

پنجاب کے شہروں گوجرانوالہ اور شکرگڑھ میں کچھ ہوٹل کھولے گئے تاہم وہاں بھی پارسل کا انتظام کیاگیا۔