ملک بھر میں کورونا وائرس کے پیش نظر جاری لاک ڈاؤن سے متعلق نیشنل کوآرڈینیشن کمیٹی (این سی سی) کا اجلاس آج ہو گا۔

تفصیلات کے مطابق وزیر اعظم عمران خان کی زیر صدارت نیشنل کوآرڈینیشن کمیٹی کا اجلاس آج ہو گا، اجلاس میں وزراءاعلیٰ، وفاقی وزراء اور متعلقہ حکام شریک ہوں گے۔

اجلاس میں لاک ڈاؤن میں مزید توسیع سےمتعلق فیصلہ کیا جائے گا جبکہ نیشنل کوآرڈینیشن کمیٹی اجلاس میں لاک ڈاؤن میں جزوی نرمی پربھی غور کیا جائے گا ۔

وزیراعظم کی زیرصدارت اجلاس میں 14 اپریل کے بعد تعمیراتی شعبہ کھولنے کےحتمی فیصلہ پر مشاورت کی جائے گی جبکہ کراچی سے فلائیٹ آپریشن شروع کرنے کا بھی فیصلہ متوقع ہے ۔

سندھ حکومت کراچی سےفلائیٹ آپریشن شروع کرنے کے لیے قرنطینہ ٹیسٹنگ کی سہولیات سے آگاہ کرے گی ۔

نیشنل کوآرڈینیشن کمیٹی کے اجلاس میں میڈیکل آلات کی فراہمی اور کورونا ٹیسٹنگ کی استعداد پر نیشنل مینجمنٹ ڈزاسٹر اتھارٹی ( این ڈی ایم اے) حکام کی جانب سے بریفنگ دی جائے گی۔

این سی سی اجلاس کے دوران معاون خصوصی برائے صحت کورونا وائرس کے بڑھتے کیسز سے متعلق کمیٹی کو  آگاہ کریں گےجبکہ بارڈرز کو تجارتی مقاصد کے لیے کھولنے کی تجاویز پر بھی غور ہوگا۔