کورونا وائرس کی عالمی وباء نے جہاں دنیا بھر کے انسانوں کو اپنی لپیٹ میں لے رکھا ہے  وہیں اس کے حوالے سے متضاد باتیں بھی سامنے آرہی ہیں۔

امریکہ کی جانب سے چین پر اور چین کی جانب سے امریکہ پر یہ الزام عائد کیا جارہا ہے کہ کورونا وائرس انہوں نے کسی لیبارٹری میں تیار کیا ہے۔

گذشتہ ہی دنوں ایسا ہی  ایک بیان نوبل انعام یافتہ جاپانی سائنسدان کے نام سے گردش کر رہاتھا کہ یہ وائرس  چین کی لیب میں انسانوں نے بنایا  ہے۔

تاہم برطانوی  نشریاتی ادارے نے اس بات کی تردید  کرتے ہوئے کہا ہے کہ نوبل انعام یافتہ جاپانی سائنسدان سے منسوب کیا  جانے والا یہ بیان بالکل غلط ہے، انہوں نے ایسا ہرگز نہیں کہا۔

جاپانی سائنسدان  پروفیسر تاسوکو ہونجو کے نام سے اس بیان کو غلط انداز میں سوشل میڈیا پر مختلف زبانوں میں پھیلایا جا رہا ہے۔

پروفیسر تاسو کو ہونجو کا کہنا تھا کہ ان کے نام سے جھوٹ پر مبنی خبر  چلائے جانے پر انہیں کافی پریشانی کا سامنا کرنا پڑرہا ہے۔

واضح رہے کہ  پروفیسر تاسو کو ہونجو نے 2018 میں فزیولوجی اور میڈیسن میں نوبل انعام جیتا تھا۔