قومی کرکٹ ٹیم کے سابق ٹیسٹ کرکٹر توفیق عمر بھی کورونا کا شکارہوگئے۔

38 سالہ اوپنر توفیق عمر کا کورونا وائرس کا ٹیسٹ مثبت آگیا ہے جس کے بعد وہ اپنے گھر میں قرنطینہ میں چلے گئے ہیں۔

توفیق عمر کا کہنا ہے کہ شوکت خانم اسپتال سے 2 دن پہلے ٹیسٹ کرایا تھا جس کی رپورٹ مثبت آئی ہے، ڈاکٹروں کی ہدایت پر خود کو سیلف آئیسولیٹ کیا ہے۔

ان کا کہنا تھا کہ خود کو تندرست محسوس کررہا ہوں، ڈاکٹرز نے بخارکی صورت میں پیناڈول دوا کھانےکا مشورہ دیا ہے۔

سابق ٹیسٹ کرکٹر پی سی بی کی جونیئر سلیکشن کمیٹی کے رکن بھی ہیں اور انہوں نے 44 ٹیسٹ اور 22 ون ڈے میچز میں پاکستان کی نمائندگی کی ہے۔

  توفیق عمر نے 44 ٹیسٹ اور 22 ایک روزہ میچز میں پاکستان کی نمائندگی کرتے ہوئے ٹیسٹ کرکٹ میں 7 سنچریوں اور 14 نصف سنچریوں کی مدد سے 2963 رنز بنائے جبکہ ایک روزہ کرکٹ میں 3 نصف سنچریوں کی مدد سے 504 رنز سکور کرنے میں کامیاب ہوئے۔