افغان صدر کی جانب سے طالبان قیدیوں کی رہائی کے اعلان کے بعد افغان حکومت نے مزید 100  طالبان  قیدی رہا کردئیے ۔

فرانسیسی خبر رساں ادارے کے مطابق افغان طالبان نے عید کے تین دنوں میں جنگ بندی کا اعلان کیا تھا جس کا افغان صدر اشرف غنی نے خیر مقدم کرتے  ہوئے طالبان کے 2 ہزار قیدیوں کو رہا کرنے کا اعلان کیا تھا جن میں سے 100 قیدیوں کورہا کردیا گیا ہے۔

افغانستان کے نیشنل سیکیورٹی کونسل کے ترجمان جاوید فیصل نے فرانسیسی خبر رساں ایجنسی کو بتایا کہ افغان حکومت نے بگرام کی جیل سے 100 طالبان قیدیوں کو رہا کیا ہے۔

واضح رہے کہ 29 فروری 2020 کو قطر کے دارالحکومت دوحہ میں طالبان اور امریکا کے درمیان ہونے والے امن معاہدے کے تحت افغان حکومت کو 5 ہزار طالبان قیدیوں کو رہا کرنا تھا تاہم اب تک حکومت نے ایک ہزار طالبان قیدیو کو رہا کیا ہے۔