اپوزیشن کی جانب سےکورونا وبا کےمعاملے پرسینیٹ کےاجلاس میں حکومتی انتظامات کوناکافی اورغیرذمہ دارانہ قرار دےدیاگیا اورحکومت کے فیصلےکو شدید تنقید کا نشانہ بنایا گیاہے۔

تفصیلات کے مطابق چیئرمین صادق سنجرانی کی صدارت میں سینیٹ کا اجلاس ہوا جس میں کورونا وائرس اور اس بحران کے دوران پارلیمنٹ کی کردار پر بحث کی گئی، ملک میں صحت کی سہولیات کی فراہمی پر غور بھی ایجنڈے میں شامل تھا۔

اپوزیشن لیڈرراجہ ظفرالحق نے حکومت اقدامات پر اجلاس کے دوران تنقید کے نشتر برسا دیے۔ انہوں نے کہا کہ کورونا وبا کے دوران اتحاد کی ضرورت تھی لیکن وزیر اعظم عمران خان  نے تقسیم پیدا کی، اپوزیشن سے متعلق حکومتی رویہ افسوسناک ہے،حکومت کی جانب سے کورونا سے متعلق درست پالیسی نہیں اپنائی جارہی اور رویہ بھی انتہائی منفی ہے۔

اجلاس میں پیپلزپارٹی رکن سینیٹ شیری رحمان نے اظہار خیال کرتے ہوئے کہا کہ یہ ایسا وقت ہےکہ ابھی ہمیں یکجہتی کی ضرورت ہے، لاک ڈاوَن میں نرمی ہوتے ہی عید کی خریداری کی جارہی ہے،لاک ڈاوَن میں نرمی پر حکومت کا پیغام واضح نہیں ہے۔

انہوں نے کہا کہ حالات ایسے بنتے جارہے ہیں کہ ہمارے پاس صحت کےوسائل بھی ختم ہورہے ہیں،انہوں نے سوال اٹھایا کہ وزیراعظم کہاں اور لاپتہ کیوں ہیں؟ اس بات کا یقین ہے وزیراعظم کورونا سے ڈرتے نہیں لیکن پارلیمان میں آتے نہیں۔ آج سمارٹ کل کریزی لاک ڈاوَن اور پتہ نہیں کیاکیا ہورہا ہے؟ کورونا کے علاوہ کسی اور معاملے پر بات حلف سے دیانت داری نہ ہونے کے مترادف ہے۔

شیری رحمان نے کہا کہ ایسا تاثرکیوں دیا جارہا ہےکہ کورونا کی صورت حال کا سامنا صرف حکمران جماعت کو ہے؟ ہم کسی کو تنہا نہیں چھوڑ رہے، ہم حکومت سے پالیسی چاہتے ہیں۔

شیری رحمان کو وزیرخارجہ نے جواب دیتے ہوئے کہا وزیراعظم اسلام آباد میں ہی موجود ہیں اور روزانہ کی بنیاد پر کورونا سے متعلق اقدامات کا جائزہ لیتے ہیں۔

وزیرخارجہ شاہ محمود قریشی نے اس موقع پر کہا کہ کب کورونا سے بچاؤ کا ویسکین تیار ہوگا کسی کو علم نہیں، کورونا کا حل لاک ڈاؤن نہیں۔اس بات میں کوئی شک نہیں کہ کوروناوائرس ایک چیلنج ہے اور مالی طور پر مستحکم ممالک بھی اس سے متاثرہوئے ہیں۔

انہوں نے کہا کہ حکومت نے وقتی طور پر تسلی بخش اقدامات کیے اور وزیراعظم ہر اجلاس میں سب سے پہلے وزیراعلیٰ سندھ کو سنتے ہیں اور ہم نے پیپلزپارٹی کے ساتھ مل کر کورونا کے خلاف حکمت عملی تیار کی۔