بلوچستان کی جیلوں میں موجود قیدیوں میں کورونا وائرس تیزی سے پھیل رہا ہے جس کے پیش نظر آئی جی جیل خانہ جات نے صوبائی حکومت کو علیحدہ کورونا اسپیشل جیل وارڈ بنانے کی تجویز دے دی جو کہ صوبے بھر کی جیلوں میں کورونا میں مبتلا قیدیوں کیلئے ہوگی۔

تفصیلات کے مطابق آئی جی جیل خانہ جات بلوچستان ملک یوسف کا کہناہے کہ کوئٹہ ،مستونگ اور ژوب کی جیلوں میں قیدیوں اور عملے میں کورونا کے کچھ کیسز سامنے آئے ہیں۔ جس کے بعد محکمہ جیل نے محکمہ صحت کو صوبے کی تمام گیارہ جیلوں کے قیدیوں اور عملے کا کورونا ٹیسٹ کرانے کیلئے مراسلہ لکھ دیا ہے۔

انہوں نے بتایا کہ جیلوں میں مہلک وائرس کے پھیلاؤ کے خطرے کے پیش نظر تقریباً چار ماہ سے قیدیوں کی اپنے رشتہ داروں سے ملاقات بند ہے، جبکہ کسی بھی نئے قیدی کو کورونا ٹیسٹ کے بغیر جیلوں میں نہیں لیا جارہا۔

آئی جی جیل خانہ جات کے مطابق کورونا اسپیشل جیل وارڈ میں مہلک وائرس میں مبتلا قیدیوں کو پولیس اور محکمہ صحت کے عملے کی نگرانی میں رکھا جائے گا۔