لاہور، اسلام آباد اور کراچی  کے مختلف علاقوں کے بعد  کل (جمعے) سے حیدرآباد کے 90  سے زائد علاقوں میں لاک  ڈاؤن  کیا جائے گا ۔

نوٹیفکیشن کے مطابق حیدرآباد کے 90 سے زائد علاقوں میں جمعے سے 2 ہفتے کے لیے لاک ڈاؤن ہوگا۔

نوٹیفکیشن کے مطابق لاک  ڈاؤن کے  دوران ان علاقوں میں ریسٹورنٹس، شاپنگ مال، مارکیٹس اور دفاتر بند رہیں گے تاہم میڈیکل اسٹور کھلے رہیں گے۔

دوسری جانب  کراچی کے تمام 6 اضلاع کے منتخب علاقوں میں بھی لاک ڈاؤن کا نوٹیفکیشن جاری کردیا گیا ہے۔کمشنر کراچی کے اعلامیے کے مطابق لاک ڈاؤن پر آج شام 7 بجے سے عمل درآمد ہو گا، جو 2 جولائی تک جاری رہے گا، ان علاقوں میں آنے اور جانے والوں کو ماسک لگانا لازمی ہوگا اور تجارتی سرگرمیوں پر پابندی ہوگی۔

دوسری جانب کوئٹہ میں کورونا وائرس سے زیادہ متاثر 20 یونین کونسلوں کی نشاندہی کی گئی ہے، جس پر حکومت بلوچستان نے بھی آئندہ 2 روز میں ان علاقوں میں لاک ڈاؤن کا فیصلہ کیا ہے۔

واضح رہے کہ پاکستان میں کورونا وائرس کے کیسز کی تعداد 1 لاکھ 60 ہزار 118 ہو چکی ہے، جبکہ 3 ہزار 93  افراد جان  کی بازی ہار چکےہیں ۔