برطانوی اور ناروے کے سائنسدانوں نے دعویٰ کرتے ہوئے کہا ہے کہ کورونا وائرس کی وبا  قدرتی نہیں بلکہ اسے ایک بڑی سازش کے تحت لیبارٹری میں بنایا گیا ہے۔

کورونا وائرس سے متعلق پہلے ہی امریکا اور دیگر ممالک کی جانب سے چین پر الزام لگایا گیا ہے کہ جان لیوا وباچین کی لیبارٹری میں تیار کی گئی  تاہم چین نے ہمیشہ ہی الزام کو مسترد کرتے ہوئے بے بنیاد قرار دیا۔

ناروے اور برطانیہ کے سائنسدانوں نے دعویٰ کرتے ہوئےکہا ہے کہ کورونا وائرس ایک خاص عمل کے تحت  لیبارٹری میں تیار کیا گیا ہے۔

یہ دعویٰ ناروے کے برجر سورینسن اور برطانوی پروفیسر اینگس ڈلگلیش نے برطانوی انٹیلی جنس ادارے ایم آئی 6 کے سابق سربراہ سر رچرڈ ڈیئرلو کی معاونت سے ہونی والی ایک تحقیق میں کیا ہے۔

ان کا کہناہے کہ کورونا وائرس کی ظاہری جھلی ایسے تیز نوک دار پروٹین سے بنی ہے جو مصنوعی طور پر داخل کیے گئے ہیں جب کہ تحقیق میں اس بات کو بھی واضح کیا گیا ہے کہ انسانی جسم میں دریافت ہونے کے بعد سے کورونا میں بہت کم تبدیلی دیکھی گئی ہے جس سے ظاہر ہوتا ہے کہ یہ پہلے ہی انسانوں کے لیے ڈھالا گیا ہے۔

سائنسدانوں کا کہناہےکہ  خصوصیات کے لحاظ سے کورونا سارس سے یکسرالگ  ہیں،  یہ خصوصیات پہلے کبھی نہیں دیکھی گئیں۔

انہوں نے وضاحت کی کہ چین اور امریکا نے کورونا وائرس پر کئی عرصے تک مشترکہ تحقیق کی ہے جس میں وائرس کے بڑھنے، پھیلنے اور منتقلی کی صلاحیت سے متعلق مطالعہ بھی کیا گیا۔

سربراہ برطانوی خفیہ ایجنسی کے سر ڈیئرلو کے مطابق تحقیق سے یہ بات سامنے آئی ہے کہ دنیا کو مفلوج کرنے والامہلک  وائرس لیب میں بنایا گیا ہے، انہوں نے یہ بھی کہا کہ  ہوسکتا ہے کہ تجربے کے دوران یہ وائرس ناقص انتظامات کے باعث نکل گیا ہو۔

سر ڈیئرلو کے مطابق متعدد اداروں نے یہ تحقیق چین کی ناراضی کے خدشات کے پیش نظر شائع کرنے سے معذرت کی ہے۔

واضح رہے کہ امریکی صدر ڈونلڈ ٹرمپ نے دنیا بھر میں پھیل جانے والی وبا کا الزام چین پر عائد کرتے ہوئے کہا تھا کہ کورونا وائرس کے پھیلاؤ کا تعلق ووہان کی لیبارٹری سے ہے۔

دوسری جانب امریکی انٹیلی جنس کمیونٹی اور سائنسدان نے کہا کہ کورونا وائرس جانور سے انسان میں منتقل ہوا اور اس کا تعلق چین کے شہر ووہان کی لیب سے نہیں ہے۔