پاکستان میں مصوری اور فائن آرٹ کے شعبے میں خدمات پر پروفیسر اینا مولکا احمد کو گوگل نے اپنے ڈوڈل کے ذریعے خراج عقیدت پیش کیا ہے۔

اینا مولکا احمد پاکستان کی سب سے پہلی آرٹس ٹیچر ہیں جو اپنے طالب علموں کی صلاحیتوں کو بہتر بنانے کیلئے کلاس روم سے باہر پینٹ کرنے کیلئے لے کر گئیں۔

اینا مولکانے یکم جون 1940 کو پنجاب یونیورسٹی، لاہور میں فائن آرٹس ڈیپارٹمنٹ کی بنیاد رکھی جو اب کالج آف آرٹس اینڈ ڈیزائن بن کر کئی دہائیوں سے آرٹس کی شوقین طلبہ کا اہم تعلیمی مرکز ہے۔

 پاکستان میں آرٹ کی فروغ میں اپنا کردار ادا کرنے والی اینا مولکا نے 1917 میں ایک یہودی جوڑے کے گھر میں آنکھ کھولی جو ان دنوں لندن میں مقیم تھا۔

اینا مولکا کم عمری ہی سے آرٹسٹ بننا چاہتی تھیں ابتدائی تعلیم کے بعد والدین کی ناراضی کے باوجود انہوں نے لندن کے رائل کالج آف آرٹس میں داخلہ لیا۔

1935 میں اینا مولکا کی رائل کالج آف آرٹس میں ملاقات شیخ احمد سے ہوئی جو خود بھی مصور تھے اور ان کا تعلق ہندوستان سے تھا، 1939 میں اینا مولکا نے کالج سے پاس ہونے کے بعد اپنے اسی ہم جماعت شیخ احمد سے شادی کرلی اور اینا مولکا احمد بن کر ان کے ساتھ پاکستان چلی آئیں۔

انہوں نے اپنے شوہر کے ہمراہ لاہور میں رہتے ہوئےپنجاب یونیورسٹی میں شعبہ فنونِ لطیفہ کی بنیاد رکھی اور 1940 سے 1972 تک اس شعبے کی چیئرپرسن رہیں۔

اینا مولکا کا انتقال 1994 میں ہوا، انہیں حکومتِ پاکستان نے  مصوری کے شعبے میں خدمات پر1963 میں تمغہ امتیاز اور صدارتی تمغہ برائے حسنِ کارکردگی سے نوازا۔