چین میں کورونا وائرس کے مزید 19 کیسز سامنے آگئے، جن میں سے 7 مریضوں کا تعلق بیجنگ سے ہے۔

خبر ایجنسی کے مطابق عالمی ادارۂ صحت نے چین میں نئے کیسز سامنے آنے کے بعد اپنی ٹیم اگلے ہفتے چین بھجوانے کا اعلان کر دیا ہے۔

اس وقت چین میں 428 کورونا وائرس کے مریض اسپتالوں، قرنطینہ مراکز یا گھروں میں آئسولیٹ ہیں جن میں سے 7 مریضوں کی حالت تشویش ناک ہے جبکہ 78 ہزار 469 کورونا مریض شفایاب ہو چکے ہیں۔

چین میں کورونا مریضوں کی تعداد 83 ہزار 531 ہو چکی ہے اور اس سے ہونے والی اموات کی تعداد 4 ہزار 634 ہے۔

واضح رہے کہ چین جہاں دنیا میں کورونا وائرس کا پہلا کیس سامنے آیا تھا وہاں اس وباء پر کافی حد تک قابو پایا جا چکا ہے اور روزانہ صرف چند نئے کورونا مریض سامنے آتے ہیں جبکہ اس سے اموات میں کافی عرصے سے کوئی اضافہ سامنے نہیں آیا ہے۔