پاکستان میں آج صبح 9 بج کر 26 منٹ پر سورج کو گرہن لگنے کاعمل شروع ہوچکا ہے جو دوپہر 1  بجے تک جاری رہے گا۔

‘رنگ آف فائر’ کا یہ منظر دنیا کے مختلف ممالک سمیت پاکستان میں بھی دیکھا جاسکے گاجبکہ پاکستان کے کچھ علاقوں میں تو مکمل سورج گرہن ہو گا۔

کراچی میں سورج گرہن کا آغاز 9 بج کر 26 منٹ پر ہوگا اور11بج کر 40 منٹ پر گرہن اپنے عروج پر ہوگا جبکہ لاہورمیں 11 بج کر 26 منٹ پرسورج گرہن اپنے عروج پر ہوگا۔

پاکستان کے کچھ علاقوں میں جزوی اور کہیں مکمل طور پر روشنی کا ہالہ دیکھا جاسکے گا جبکہ  گوادر، سکھر اور لاڑکانہ میں سورج گرہن کے دوران ‘رنگ فائر’ کا منظر دیکھا جاسکے گا۔

ماہر امراض چشم کا کہنا ہے کہ گرہن کے وقت سورج کی جانب دیکھنے سے بینائی ختم ہوسکتی ہے اس لیے لوگ گھروں میں رہیں اور بچوں کو بھی باہر مت نکلنے دیں۔

دوسری جانب ماہر فلکیات کا کہنا ہے کہ سورج گرہن محض اجرام فلکی کی گردش کا حصہ ہے، گرہن کے حوالے سے لوگوں میں پھیلی باتیں محض توہمات ہیں۔

ماہرین کی جانب سے سورج گرہن کے دوران براہ راست سورج کا مشاہدہ نہ کرنے کی ہدایت کی گئی  ہے۔

سورج گرہن کے دوران چاند زمین اور سورج کے درمیان آجاتا ہے، حالیہ سورج گرہن کے دوران سورج چاند کی پشت سے روشنی کے گول دائرے یا چھلے کی مانند نظر آئے گا۔