پاکستان کی معروف گلوکارہ حدیقہ کیانی ترک عوام سے اپنی محبت کا منفرد انداز میں اظہار  کیا ہے، گلوکارہ کی جانب سے تُرک سیریز ’ارطغرل غازی‘ کو خراج تحسین پیش کیا گیا ہے۔

حدیقہ کیانی نے ترک سیریز ’ارطغرل غازی‘ کا گانا گاکر تُرکی کے لوگوں کے دل جیت لیے ہیں۔

انہوں نے ویڈیو شیئرنگ ایپ انسٹاگرام پر اپنی خوبصورت آواز میں’ارطغرل غازی‘ کا ٹائٹل سانگ گاکر پاکستانی مداحوں کے بھی دل جیت لیے۔ حدیقہ کی آواز میں ارطغرل غازی کے ٹائٹل سانگ کو اب تک ہزاروں لوگوں نے لائیک کیا ہے۔

See more

گلوکارہ نے ویڈیو پوسٹ کرتے ہوئے ایک طویل کیپشن بھی لکھاہے جس میں ان کا کہنا ہے کہ پاکستان اور ترکی کے لیے ان کی محبت کسی دوسرے ملک کی محبت سے بالکل برعکس ہے۔

انہوں نے کہا کہ ’ کیونکہ میرے آباؤ اجداد کا تعلق ترکی کے شہر ازمیر سے ہے اور یہی وجہ ہے کہ میں بچپن سے ہی  ترکی سے وابستہ رہی ہوں اور میں نے بچپن میں ہمیشہ ترکی میں منعقدہ بچوں کے بین الاقوامی میلے میں پاکستان کی نمائندگی کی ہے‘۔‘

گلوکارہ کا کہناتھا کہ ’2005 میں جب میں واپس ترکی گئی تھی تو میں نے ’اتاترک کلچرل سینٹر اینڈ اوپیرا ہاؤس‘ میں ایک بار پھر سے پاکستان کی نمائندگی کی تھی اور اس دوران سب سے خاص بات یہ تھی کہ میں نے ترکی کا مشہور گانا ’سین اگلاما‘ بھی گایا تھا اور ترک لوگوں سے پاکستانی عوام کی محبت کا اظہار کیا تھا۔

حدیقہ کا مزید کہناتھا کہ ’اب 2020 میں پاکستان میں ترک سیریز ’ارطغرل غازی‘ کی کامیابی کے بعد میں نے ایک بار پھر ترکی کے لیے اپنی محبت کا اظہار کرنے کا ارادہ کیا اور میں نے اس ضمن میں ترک زبان میں ’ارطغرل غازی‘ کا ٹائٹل سانگ گایا ہے۔

ان کا کہناتھا کہ ’میں نے اپنی گلوکار ی کے ذریعے ترکی کے لوگوں کو خراج تحسین پیش کیا ہے تاکہ اسی طرح پاکستان اور ترکی کے مابین ثقافت، فن اور محبت کے ذریعے دوستی پروان چڑھتی رہے۔‘

ترکوں کو اپنا پیغام دیتے ہوئے پاکستانی گلوکارہ نے اس امید کا اظہار بھی کیا ہے کہ انہیں ان کی آواز میں یہ گانا پسند آئے گا۔

2 منٹ 58 سیکنڈز پر مشتمل حدیقہ کیانی کے اس گانے کو صرف چند ہی گھنٹوں میں 17ہزار سے زائد افراد سُن چکے ہیں اور ترکی سمیت پاکستانی عوام اس گانے کو خوب پسند کر رہے ہیں۔

واضح رہے کہ وزیراعظم عمران خان کی ہدایت پر ترک سیریز ’ارطغرل غازی‘ کو اُردو زبان میں ڈب کرکے سرکاری ٹی وی چینل پر نشر کیا جارہا ہے اور دُنیا بھر کی طرح پاکستان میں بھی شہرہ آفاق ترک سیریز بےحد مقبول ہو رہی ہے۔