چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل محمد افضل نے کہا ہےکہ صوبے کورونا وائرس کا جتنا ٹیسٹ کرنا چاہتے ہیں کریں، سامان کی کمی نہیں ہے۔

تفصیلات کے مطابق اسلام آباد میں میڈیا سے بات چیت کرتے ہوئے چیئرمین این ڈی ایم اے نے بتایا کہ چین سے امدادی سامان لےکر ایک اور طیارہ اسلام آباد پہنچا ہے۔

انہوں نےکہا کہ حکومت اور عوام کی طرف سے چین کے شکر گزار ہیں، چین کے پاکستان کے ساتھ تعاون اور اقدامات کو سراہتے ہیں۔

چیئرمین این ڈی ایم اے نےکہا کہ چین سے آنے والے اس طیارے میں ڈیڑھ لاکھ این 95 ماسک اور 15 لاکھ طبی ماسک بھیجے گئے ہیں۔

ان کا مزید کہنا تھا کہ تمام صوبوں کو 250 وینٹی لیٹر دے چکے ہیں، ہمارے پاس اس وقت مزید 600 وینٹی لیٹر موجود ہیں۔

چیئرمین این ڈی ایم اےنے بتایا کہ کورونا کے مریضوں کے لیے وینٹی لیٹر سے زیادہ آکسیجن کی ضرورت ہے اور اس سلسلے میں پشاور اور کراچی جا کر صورتِ حال کا جائزہ لیں گے