کورونا کے باعث ڈیرن براوو سمیت ویسٹ انڈیز کے 3 کھلاڑی اگلے ماہ انگلینڈ میں ہونے والی ٹیسٹ سیریز سے دستبردار ہوگئے ہیں ۔

برطانوی نشریاتی ادارے کی رپورٹ کے مطابق بلے باز شیروون ہیٹمیئر، ڈیرن براوو اور آل راؤنڈر کیمو پاؤل نے انگلینڈ کا دورہ کرنے والی 25 رکنی ٹیم کا حصہ نہ بننے کا فیصلہ کیا ہے ۔

دوسری جانب ویسٹ انڈیز کرکٹ بورڈ نے کہا کہ مستقبل میں انتخاب کے موقع پر ہیٹمیئر، براوو اور کیموپاؤل کے فیصلے آڑے نہیں آئیں گے۔

کرکٹ ویسٹ انڈیز نے اپنے بیان میں کہا کہ کھلاڑیوں کا کورونا ٹیسٹ رواں ہفتے ہوگا اور 8 جون کو نجی پرواز سے برطانیہ روانہ ہوں گے۔

واضح رہے کہ انگلینڈ اور ویسٹ انڈیز کے درمیان 3  ٹیسٹ  میچز کی سیریز کے نئے شیڈول کے مطابق 8 جولائی کو بغیر تماشائیوں کے شروع ہوگی۔

دونوں ٹیموں کے درمیان  3  ٹیسٹ میچز کی  سیریز کا پہلا ٹیسٹ 8 جولائی کو ساؤتھمپٹن میں شروع ہوگا جس کے بعد دونوں ٹیسٹ اولڈ ٹریفورڈ میں بالترتیب 16 جولائی اور 24 جولائی کو شروع ہوں گے۔

ویسٹ انڈیز نے 14 رکنی ٹیم کے ساتھ ساتھ 11 اضافی کھلاڑیوں کو متبادل کے طور پر منتخب کرلیا ہے جو ٹریننگ میں اسکواڈ کا حصہ ہوں گے اور ضرورت پڑنے پر ٹیم کو دستیاب ہوں گے۔

ویسٹ انڈیز کی جانب سے اعلان کردہ ٹیم میں جیسن ہولڈر (کپتان)، جیریمی بلیک ووڈ، بونر، کریگ بریتھویٹ، شیمرابروکس، جان کیمبل، روسٹن چیز، رکیم کورنوال، شین ڈاؤریچ، چیمار ہولڈر، شے ہوپ، الزاری جوزف، ریمون ریفر اور کیماروچ شامل ہیں

اضافی کھلاڑیوں میں سنیل ایمبریس، جوشوا ڈاسلوا، شینن گیبرئیل، کیون ہارڈنگ، کائل مائیرز، پریسٹن مک سوین، مارکوئینو منڈلے، شین موسلے، اینڈرسن فلپ، اوشین تھامس اور جومیل واریکن کے نام ہیں۔

خیال رہے کہ 3 ٹیسٹ میچوں کی سیریز اصل شیڈول کے مطابق 4 جون سے شروع ہونے والی تھی تاہم کورونا وائرس کے باعث ملتوی کردی گئی تھی۔