سندھ حکومت کی جانب سے پیٹرول پمپس 24 گھنٹے کھلے رکھنے کی اجازت دینے کا بڑا فیصلہ کرلیاگیا۔

تفصیلات کے مطابق وزیر اطلاعات سندھ ناصر حسین شاہ نے اپنے ایک بیان میں کہا کہ پیٹرول پمپس 24 گھنٹے کھلے رکھنے کا فیصلہ حالیہ بارشوں کی صورتحال میں عوامی مشکلات کے پیش نظر کیا گیا ہے۔

ناصر حسین شاہ نے کہا کہ گاڑی اور جنریٹر کے لیے پیٹرول کے حصول میں لوگوں کو مشکلات ہیں، پیٹرول پمپس کھلے رکھنے کا فیصلہ عوامی مفاد میں کیا گیا۔

انہوں نے کہا کہ پیٹرول پمپس کھلے رکھنے سے متعلق نوٹیفکیشن آج جاری کردیا جائے گا۔

خیال رہے کہ سندھ حکومت نے لاک ڈاؤن کے تحت پیٹرول پمپس شام 5 بجے تک کھولنے کی اجازت دی تھی تاہم اب عوام کی سہولت کیلئے پیٹرول پمپس 24 گھنٹے کھلے رہیں گے۔