کراچی کے علاقے کورنگی میں 14 سالہ لڑکا کرنٹ لگنے سے جاں بحق ہوگیا۔

تفصیلات کے مطابق اسنوکر کلب کا بجلی کا غیر قانونی کنکشن کمسن لڑکے کی موت کا سبب بن گیا، غیر قانونی کنکشن کے تار سے کرنٹ لگنے سے طاہر جاں بحق ہوا۔

ریسکیو زرائع کے مطابق حادثہ کورنگی ڈھائی نمبر میں پیش آیا، علاقہ مکینوں کا کہنا ہے کہ بچے کی موت اسنوکر کلب میں غیر قانونی کنکشن کی تار سے کرنٹ لگنے سے ہوئی۔

دکاندار نے غیر قانونی کنکشن سے لائٹ لی اور ارتھ گیس کے پائپ سے لیا تھا، طاہر غریب سبزی فروش گھرانے سے تعلق رکھتا تھا۔

اسنوکر کی دکان میں کھیلنے کے دوران کرنٹ لگنے سے ایک اور متاثرہ بچے نے بتایا کہ صبح اسنوکر کھیلنے کے دوران مجھے 2 مرتبہ کرنٹ لگا تھا، میں نے کرنٹ لگنے کا دکاندار کو بھی بتایا تھا، دکاندار نے میری بات سنی ان سنی کردی تھی۔

واقعہ سے متعلق کے الیکٹرک کا تاحال کوئی موقف سامنے نہیں آیا ہےنہ ہی بچے کے والدین کی جانب سےقانونی چارہ جوئی کی اطلاع موصول ہوئی۔