دنیا ابھی کورونا کے وار سے ہی نہیں سنبھل پارہی کہ اب چین سے یہ خبر آئی ہے کہ ایک شخص میں بیبونک (گلٹی دار طاعون) کی تصدیق ہوئی ہے۔

غیر ملکی خبررساں ادارے کے مطابق چین کے علاقے اندرون منگولیا میں ایک چرواہے میں بیبونک یا گلٹی دار طاعون کی تصدیق اس وقت ہوئی ہے۔

رپورٹ کے مطابق اندرون منگولیا کے شہر بایان نور کے ہیلتھ کمیشن نے بتایا ہے کہ ایک چرواہے میں طاعون کی اس قسم کی تصدیق اتوار کے روز ہوئی، جبکہ اسپتال میں زیرعلاج اس مریض کی حالت اب بہتر ہے۔

شہری حکومت کا کہنا ہے کہ طاعون کی روک تھام کے اقدامات پر عمل کیا جارہا ہے جن کا نفاذ سال کے آخر تک رہے گا۔

حکام کی جانب سے ہائی الرٹ جاری کیا ہوا ہے، جبکہ لوگوں کو متاثرہ جانوروں بالخصوص مارموت کے شکار، ایک سے دوسری جگہ منتقل کرنے یا کھانے کے حوالے سے خبردار کیا گیا ہے جبکہ لوگوں سے کسی بیمار یا مردہ چوہے کے بارے میں رپورٹ کرنے کا بھی کہا گیا ہے۔

مذکورہ بیماری کو قرون وسطیٰ میں سیاہ موت کا نام دیا گیا تھا، جو Yersinia pestis bacterium کا نتیجہ ہوتا ہے اور پسو کے ذریعے چوہوں میں منتقل ہوکر انسانوں تک پہنچ جاتا ہے۔

تاہم گلٹی دار طاعون علاج نہ کروانے والے 30 سے 60 فیصد کیسز میں جان لیوا ثابت ہوتا ہے جبکہ آغاز میں ہی اینٹی بائیوٹیکس سے اس کا علاج ممکن ہے۔

واضح رہے ماضی میں (1300 کے بعد) سیاہ موت کے نتیجے میں یورپ میں 5 کروڑ افراد ہلاک ہوئے تھے