راولپنڈی کے نواحی علاقے میال میں دو گروہوں کی پرانی دشمنی نے ایک ہی خاندان کے 9 افراد کی جانیں لے لیں

پولیس کے مطابق مسلح افراد جمعے کی شب مخالف گروپ کے گھر میں گھس گئے اور اندھا دھند فائرنگ شروع کردی کی جس کے نتیجے میں 5 خواتین اور 4 بچے جاں بحق جبکہ 3 بچے زخمی ہو گئے۔

پولیس کے مطابق افسوسناک واقعے میں جاں بحق ہونے والے بچوں کی عمریں ایک سے تین سال کے درمیان ہیں۔

پولیس کا کہناہے کہ چند روز پہلے بھی اظہر اور رب نواز گروپ کے درمیان فائرنگ سے رب نواز گروپ کی ایک خاتون جاں بحق ہوگئی تھی۔

ایس ایس پی آپریشنز کا کہنا ہے کہ سرچ آپریشن کے دوران 2 ملزمان گرفتار کرلیے گئے ہیں جن کے پاس سےاسلحہ برآمد کر لیا گیا ہے جب کہ مرکزی ملزم اور ساتھیوں کی گرفتاری کے لیے ایس ایس پی آپریشنز کی سربراہی میں سرچ آپریشن جاری ہے۔

دوسری جانب ہلاک ہونے والے ایک ہی خاندان کے 9 افراد کی میتوں کو پوسٹ مارٹم کے لیے ڈی ایچ کیو اسپتال منتقل کردیا گیا اور پھر پوسٹ مارٹم کے بعد لاشوں کو ایمبولینسوں کے ذریعےگاؤں منتقل کیا گیا۔

وزیراعلیٰ پنجاب عثمان بزدار نے واقعے کا نوٹس لیتے ہوئے سی پی او راولپنڈی سے رپورٹ طلب کر لی ہے۔