سندھ بھر میں سی این جی اسٹیشن آج صبح 8 بجے سے 48 گھنٹوں کے لئے بند کر دیئے گئے ہیں ۔

تفصیلات کے مطابق آل پاکستان سی این جی ایسوسی ایشن کاکہنا ہے کہ سوئی سدرن گیس نے جمعہ سے اتوار تک سی این جی بند کرنے کا اعلان کیا تھا جس کے بعد اب سندھ بھر میں سی این جی اسٹیشنز اتوار کی صبح 8 بجے کھلیں گے۔

سوئی سدرن گیس حکام کا کہناہے کہ کےالیکٹرک کو اضافی گیس فراہم کی گئی ہے اس لیے سی این جی بند کرنے کا فیصلہ کیا گیا ۔

دوسری جانب آل پاکستان سی این جی ایسوسی ایشن کے مرکزی چیئرمین غیاث پراچہ نے کہا ہے کہ پہلے ہی نقصان میں جانے والے سی این جی سیکٹر کی گیس کے الیکٹرک کو دینا قابل قبول نہیں۔

آل پاکستان سی این جی ایسوسی ایشن کے مرکزی چیئرمین نے کہا کہ سی این جی اسٹیشنز بند کر کے گیس کے الیکٹرک کو دینا مسئلے کا حل نہیں ہے۔

ان کا کہناتھا کہ پاور پلانٹس فرنس آئل سے بھی چل سکتے ہیں، سی این جی سیکٹر کو تو پہلے ہی کورونا وبا کے باعث ٹرانسپورٹ میں کمی کی وجہ سے بہت نقصان کا سامنا ہے۔