جاگنگ اور ورزش کے شوقین افراد کے لئے خوشخبری ،سندھ حکومت نے جاگنگ پارکس  کو کھو لنے کا حکم دے دیا ہے  ۔

تفصیلات کے مطابق سندھ بھر میں کورونا کے پیش نظر تفریحی مقامات پر بدستور پابندی برقرار رہے گی تاہم شہریوں کو پبلک پارکس میں چہل قدمی کی اجازت ہے۔

محکمہ داخلہ سندھ کی جانب سے جاری کردہ حکم نامے کے مطابق صوبے بھر میں ایسے پارکس جہاں جاگنگ ٹریکس ہیں ان پر پابندی نہیں ہے اور وہاں واک کی غرض سے جایا جا سکتا ہے لیکن امیوزمنٹ پارکس، تھیم پارکس اور واٹر پارکس پر پابندی بدستور برقرار ہے۔

حکم  نامے کے مطابق ایسے پارکس جہاں تفریحی جھولے لگے ہوں یا گیمنگ زونز ہوں وہ بھی بند رہیں گے۔

واضح رہے کہ سندھ میں کورونا  کے مریضوں کی تعداد 115213ہوگئی ہے جبکہ اموات کی تعداد 2 ہزار سے تجاوز کر گئی ہے۔