سانحہ آرمی پبلک اسکول کی انکوائری رپورٹ  مکمل کرکے چیف جسٹس آف پاکستان کو ارسال کردی گئی۔

تفصیلات کے مطابق پشاور ہائی کورٹ کےجسٹس محمد ابراہیم خان پرمشتمل انکوائری کمیشن نے سانحہ آرمی پبلک اسکول کی رپورٹ مکمل کرکے چیف جسٹس آف پاکستان کو ارسال کردی ہے۔

ذرائع نے بتایا کہ تین ہزار صفحات پر مشتمل انکوائری رپورٹ انتہائی خفیہ اور سربمہر ہے۔

سانحہ اے پی ایس انکوائری کمیشن کے فوکل پرسن عمران اللہ خان نے کہا ہے کہ سانحہ آرمی پبلک اسکول کی انکوئری کمیشن رپورٹ چیف جسٹس آف پاکستان کو پیش کی جائے گی۔

رپورٹ میں کمیشن کی جانب سے سانحہ میں شہید ہونے والے بچوں کے والدین سمیت 132 افراد کے بیانات ریکارڈ کیے گئے جن میں 101 پرائیویٹ اور 31 پولیس، آرمی اور دیگر افسران کے بیانات شامل ہیں۔

خیال رہے کہ انکوائری کمیشن سابق چیف جسٹس میاں ثاقب نثار کی جانب سے شہید بچوں اور اساتذہ کے والدین کی درخواست پر سال 2018 میں قائم کیا گیا تھا۔