امریکی وزیر خارجہ مائیک پومپیو کا کہنا ہے کہ امریکا میں ٹک ٹاک سمیت دیگر چینی ایپس پر پابندی عائد کرنے پر غور کیا جا رہا ہے۔

امریکی ٹی وی کو انٹرویوکے دوران مائیک پومپیو نے کہا کہ پابندی کی زد میں مشہور ویڈیو ایپ ٹک ٹاک بھی آئے گی۔

خیال رہے کہ امریکا میں 2020 کے پہلے تین ماہ میں 315 ملین افراد نے ٹک ٹاک ایپ ڈاون لوڈ کی تھی۔

امریکی قانون سازوں نےصارفین کی جانب سے  ٹک ٹاک کےاستعمال پر خدشات کا اظہار کیا ہے۔ انہوں نے کہا کہ وہ چینی قوانین کے بارے میں پریشان ہیں جن کے تحت نجی کمپنیوں کو وہاں کی خفیہ ایجنسیوں کیساتھ تعاون کرنا پڑتا ہے۔

امریکی کی بحری فوج میں سرکاری موبائل فون رکھنے والے افسران کو ٹک ٹاک کے استعمال سےپہلے ہی روک دیا گیا تھا۔

سائبرحملے کےخدشات پرفوجی افسران یا اہلکار جو حکومت کی جانب سے دیا گیا موبائل فون استعمال کرتے ہیں ان کو ویڈیو ایپ ٹک ٹاک استعمال کرنے کی اجازت نہیں ہے۔

امریکہ کی فوج کو خدشہ ہے کہ  ٹک ٹاک کی مالک کمپنی مسائل کھڑے کر سکتی ہے۔ مذکورہ کمپنی کی جانب سے مشکوک سرگرمیوں کے اگرچہ فی الحال کوئی شواہد نہیں ہیں لیکن مستقبل میں ہوسکتا ہے کہ یہ کمپنی چین کی حکومت کو فوجیوں کی ایسی معلومات فراہم کرے جو جاسوس بھرتی کرنے میں مددگار ثابت ہوسکتے ہیں۔

خیال رہے کہ ٹک ٹاک نے گزشتہ برس امریکہ سے 6 کروڑ 24 لاکھ ڈالر کمائی کی تھی اور یہ دنیا میں ڈاؤن لوڈ ہونے والی تیسری بڑی ایپ ہے۔