پاکستان مسلم لیگ ن نے وفاقی وزیر ہوابازی غلام سرور خان کے خلاف قومی اسمبلی میں تحریک استحقاق لانے کا فیصلہ کرلیا۔

تفصیلات کے مطابق وفاقی وزیر غلام سرورخان کے خلاف تحریک استحقاق پیر کو جمع کرائی جائے گی جس میں وفاقی وزیر کے اسمبلی میں پائلٹس کے جعلی لائسنس کے بیان کو جواز بنایا گیا ہے۔

تحریک استحقاق کے متن میں کہاگیا ہے کہ وفاقی وزیر ہوا بازی کے بیان کی ڈی جی سول ایوی ایشن نے تردید کی جب کہ  وفاقی وزیر ہوابازی کے بیان سے ارکان قومی اسمبلی کا استحقاق مجروح ہوا ہے۔

تحریک استحقاق میں موقف اختیار کیا گیا کہ وفاقی وزیرکے بیان سے پی آئی اے تباہ ہوا جس سے بیرون ممالک پائلٹس کی نوکریاں خطرے سےدوچار ہوئیں۔

دوسری جانب وزیراعظم عمران خان نے پی آئی اے میں جاری اصلاحات پر اجلاس طلب کرلیا۔

اجلاس کے دوران  وزیراعظم کو پی آئی اے میں جاری اصلاحات پر بریفنگ دی جائے گی اور وزیراعظم کو مشکوک ڈگری والے پائلٹس کے معاملہ پر پیشرفت کے بارے میں بتایا جائے گا۔