کراچی کے علاقے سرجانی ٹاؤن میں  7 ڈاکوغیرقانونی مویشی منڈی میں بیوپاریوں سے لاکھوں روپے کی رقم لوٹ کر فرار  ہوگئے ۔

تفصیلات کے مطابق سرجانی ٹاؤن بھینس کالونی کی غیرقانونی مویشی منڈی میں 7سے زائد ڈاکوؤں نے اسلحہ کے زور پر 8 سے 10 بیوپاریوں کو یرغمال بنایا اور ان سے 5 لاکھ سے زائد کی رقم لوٹ لی۔

فرار ہوتے وقت سیکیورٹی گارڈز اور ملزمان میں فائرنگ کا تبادلہ بھی ہوا مگر ملزمان فرار ہو گئے۔

دوسری جانب ناردرن بائی پاس سے بھی قربانی کے جانوروں کی چوری میں ملوث 3 ملزمان کو گرفتار کیا گیا  ہے  اور ملزمان کے قبضے سے چوری کے 14 بکرے بھی ملے ہیں۔

پولیس کے مطابق گڈاپ میں ناردرن بائی پاس پر کارروائی کرتے ہوئے قربانی کے جانوروں کی چوری میں ملوث 3 ملزمان کو گرفتار کرلیا گیا، ملزم عبدالغفار،  یامین اور نذیر کے خلاف مقدمہ بھی درج کرلیا گیا ہے۔