کراچی کے جناح اسپتال کی سربراہ ڈاکٹر سیمی جمالی نے کہا ہے کہ اسپتال میں گزشتہ روز سے بجلی کی آنکھ مچولی جاری ہے اور اسپتال میں جنریٹر کے ذریعے بجلی فراہم کی جا رہی ہے ۔

تفصیلات کے مطابق ڈاکٹر سیمی جمالی نے کہا کہ اسپتال میں گزشتہ روز سے ڈیڑھ سے دو گھنٹے کی لوڈ شیڈنگ ہورہی ہے، اسپتال میں جنریٹر کے ذریعے بجلی فراہم کررہے ہیں، کے الیکٹرک کی جانب سے گزشتہ رات سے لوڈ شیڈنگ کا سلسلہ جاری ہے۔

ڈاکٹرسیمی جمالی نے کہا کہ لوڈ شیڈنگ سے جناح اسپتال کی کالونی بھی متاثر ہے، اسپتال کے گائنی وارڈ سے متصل گریڈ اسٹیشن میں کوئی خرابی ہے جس کے بارے میں کے الیکٹرک کو شکایت درج کرادی گئی ہے، گزشتہ رات سے 6 سے زائد بار بجلی جاچکی ہے۔

دوسری جانب ترجمان کے الیکٹرک کے مطابق جناح اسپتال میں بجلی کی فراہمی معمول پر ہے، جناح اسپتال میں آج آنے والے عارضی تعطل کو فوری بحال کیا گیا۔

ترجمان کے ای کا کہنا ہے کہ گزشتہ روز اسپتال میں اندرونی فالٹ کے باعث تعطل پیش آیا تھا، اندورنی فالٹ کا کے الیکٹرک سے تعلق نہیں ہے، جناح اسپتال میں بجلی کی فراہمی معمول پر ہے۔