بھارت میں خاتون نےبیٹے کے ساتھ میٹرک کا امتحان پاس کرلیا۔

بھارتی میڈیا کے مطابق ریاست مہاراشٹرا سے تعلق رکھنے والی 36 سالہ خاتون بے بی گورو نے اپنے 16 سالہ بیٹے کے ساتھ میٹرک کا امتحان دیا تھا جوکہ انہوں نے پاس کرلیا ہے۔

خاتون نے میٹرک میں 64.40 فیصد نمبرز حاصل کیے جب کہ ان کے ساتھ امتحان دینے والے بیٹے نے 73.20 فیصد نمبرز لیے۔

امتحان میں کامیابی پر خاتون کا کہنا تھا کہ ان کی شادی کم عمری میں ہوگئی تھی جس کی وجہ سے وہ اپنی اسکول کی تعلیم مکمل نہیں کرسکیں لیکن ان کے شوہر نے بیٹے کے ساتھ میٹرک کا امتحان دینے پر زور دیا اور حوصلہ افزائی کی۔

خاتون نے بتایا کہ ان کے شوہر ایک کپڑا بنانے کی فیکٹری میں کام کرتے ہیں، انہوں نے اور بیٹے نے میٹرک کا امتحان پاس کرنے میں ان کی بہت مددکی۔

خاتون کے شوہر نےبھی ان کے امتحان میں پاس ہونے پر خوشی کا اظہار کرتے ہوئے کہا کہ میری اہلیہ اور بیٹے نے ایک ساتھ پڑھائی کی اور اچھے نمبرز حاصل کیےجس پر مجھےفخرہے۔