وزیرِ اطلاعات پنجاب فیاض الحسن چوہان نے کہا ہے کہ کورونا وائرس کی وباء سے نمٹنے کے لیے پنجاب حکومت کے مثبت اقدامات کو سپریم کورٹ نے بھی سراہا ہے۔

وزیرِ اطلاعات پنجاب فیاض الحسن چوہان نے ایک بیان میں کہا ہے کہ پنجاب میں کورونا مریضوں میں نمایاں کمی پر سروسز، جناح اور دیگر بڑے اسپتالوں میں کورونا وارڈ بند کر دیئے گئے ہیں۔

انہوں نے کہا کہ سپریم کورٹ کے ریمارکس پنجاب حکومت کی کارکردگی کا منہ بولتا ثبوت ہیں، معزز جج صاحبان نے بزدار حکومت کے انتظامات کو مؤثر قرار دیا۔

فیاض الحسن چوہان کا یہ بھی کہنا ہے کہ معزز بنچ نے کہا ہے کہ بزدار حکومت کے کورونا مخالف اقدامات مثبت اور درست سمت میں ہیں۔