سرچ انجن گوگل نے پاکستان کے 73 ویں یومِ آزادی   کے  موقع  پر اپنا ڈوڈل  پاکستان کے رنگوں میں رنگ دیا۔

گوگل نے اس بار اپنے ڈوڈل میں بلوچستان میں واقع ’خوجک سرنگ‘ کو ڈیزائن کیا ہے جس میں نیچے سبز رنگ کی پٹی میں گوگل لکھا ہے۔

ڈوڈل کو سوشل میڈیا کی مقبول سائٹ فیس بک، ٹوئٹر اور میل میں شیئر کیا جاسکتا ہے جس کا آپشن دائیں جانب موجود ہے۔

3900 میٹر (3.9 کلومیٹر) طویل یہ سرنگ درّہٴ خوجک کے مقام پر واقع ہے جو سطح سمندر سے 2290 میٹر بلند ہے۔ اسے برصغیر پر قابض برطانوی حکومت نے 1888 سے 1891 کے درمیان تعمیر کیا تھا تاکہ روس کو افغانستان کے راستے برصغیر میں داخل ہونے سے روکا جاسکے۔

کوئٹہ اور چمن کے درمیان ریل کی یہ پٹڑی موجود ہے جو ہمیں انیسویں صدی میں انجینئرنگ کے ایک عظیم کارنامے کی یاد دلاتی ہے کیونکہ خوجک سرنگ 1935 کے بھیانک زلزلے میں بھی صحیح سالم رہی اور اسے کوئی نقصان نہیں پہنچا۔

واضح رہے کہ گزشتہ سال گوگل نے پاکستان کے 72 ویں یومِ آزادی کی مناسبت سے اپنے ڈوڈل میں تاریخی مقام خیبر پاس کو دکھایا تھا۔