برطانیہ میں مہلک وائرس کے بڑھتے ہوئے کیسز کے باعث 14 ستمبر سے 6 سے زائد افراد کے جمع ہونے پر پابندی لگا دی گئی۔

خبرایجنسی کے مطابق برطانیہ میں 30 افراد کے جمع ہونے کو 6 افراد تک محدود کرنے کا فیصلہ کیا گیا ہے جبکہ پابندیوں سے متعلق مزید اعلانات وزیراعظم بورس جانسن آج کریں گے۔

 برطانوی وزیر اعظم کا اپنے بیان میں کہنا تھا کہ کورونا وائرس کو پھیلنےسے روکنے کے لئے مزید اقدامات کرنے کی ضرورت ہے۔

برطانیہ میں گھر کے اندر اور باہر اجتماعات پر پابندی ہوگی تاہم کورونا سیکیور اسکول، دفاتر، اسپورٹس، شادی بیاہ تقریبات اور جنازوں پر اطلاق نہیں ہوگا۔ پابندی پر عمل درآمد نہ کرنے والوں کو جرمانے کئے جائیں گے۔

برطانوی میڈیا کے مطابق خلاف ورزی پر کم سے کم100 اور زیادہ سے زیادہ 3ہزار200 پاؤنڈ تک جرمانہ ہوگا۔

برطانوی وزیراعظم نے کہا کہ سماجی رابطوں اور افراد کے یکجا ہونے سے متعلق اصولوں کو آسان اور مضبوظ بنا رہے ہیں۔