کراچی کے علاقے گلستان جوہر میں پولیس مقابلے میں ملزماں کی فائرنگ سے پولیس کا ایک اہلکار شہید ہوگیا۔

پولیس کے مطابق اہلکاروں نے ایک مشتبہ گاڑی کو روکنے کی کوشش کی تو ملزمان فرار ہوگئے، پولیس موبائل نے ملزمان کا پیچھا کیا جس پر ملزمان نے چلتی گاڑی سے فائرنگ کر دی۔

ایس ایس پی ایسٹ ساجد سدوزئی کے مطابق گلستان جوہر میں ہونے والے مقابلے میں پولیس اور ملزمان کے درمیان دو طرفہ فائرنگ کا تبادلہ ہوا، ملزمان کی فائرنگ سے سب انسپکڑ شہید ہو گیا۔

ساجد سدوزئی نے بتایا کہ شہید اہلکار کی شناخت سب انسپکٹررحیم خان کے نام سے ہوئی ہے جو گلستان جوہر تھانے میں میں ایڈیشنل ایس ایچ او تعینات تھا۔

پولیس کی ابتدائی تفتیش کے مطابق ملزمان نے موبائل پر فائرنگ ایس ایم جی کے ذریعے کی۔

 ایس ایس پی ایسٹ کے مطابق مقابلے کے بعد پولیس کی بھاری نفری علاقے میں پہنچ گئی ہے اور علاقے کی ناکہ بندی کرکے فرار ملزمان کی تلاش شروع کردی ہے جبکہ شہید اہلکار رحیم کی میت کو اسپتال منتقل کردیا گیا ہے۔