وفاقی وزیرِ مواصلات مراد سعید کا کہنا ہے کہ اپوزیشن کا مقصد صرف اپنی جائیدادیں بچانا ہے، اپوزیشن کی نظرمیں پارلیمان صرف این آر او مانگنے، بلیک میل کرنے اور تقریریں کرکے فرار کا نام ہے۔

مراد سعید نے اپنے ایک بیان میں کہا کہ اپوزیشن کی نظر میں پارلیمنٹ کا مقصد ذاتی مفادات، این آر او مطالبے کےسوا کچھ نہیں ہے، فرزند زرداری کے مشاورت سے بلائے گئے اہم اجلاس سے زرداری لیگ نے بھی راہ فرار اختیار کیا۔

مراد سعید نے کہا کہ کسی بھی اہم مسئلے سے متعلق اپوزیشن کو بلایا جائے تو راہ فرار اختیار کرتے ہیں، ان کا مقصد مسائل کا حل اورملکی ایشوز پر اتفاق رائے نہیں، صرف اپنی جائیدادیں بچانا ہے۔

انہوں نے کہا کہ کشمیرکے اہم مسئلے پر پارلیمنٹ کے مشترکہ اجلاس میں بھی نیب کیسز کا ذکر ہوتا رہا، گلگت بلتستان کے حوالے سے بلائے گئے اہم اجلاس میں بھی انہوں نے شرکت نہیں کی۔