صوبہ بلوچستان میں  15  سال سے کم عمربچوں کے کوئلہ کانوں میں کام کرنے پر پابندی عائد کردی گئی ہے ۔

 تفصیلات کےمطابق حکومت بلوچستان نے صوبےکی کوئلہ کانوں میں چائلڈ لیبر کا نوٹس لیتے ہوئے 15 سال سے کم عمر بچوں کے کوئلہ کانوں میں کام کرنے پر پابندی عائد کردی۔

چیف مائنز انسپکٹر بلوچستان شفقت فیاض نے نجی ٹی وی چینل سے گفتگو کرتے ہوئے کہا کہ 15 سال سے کم عمر کے بچے کوئلہ کی کانوں میں کام نہیں کرسکیں گے جبکہ  ڈاکٹرز سے فٹنس سرٹیفکیٹ کے بغیر 17 سال تک کے جوان بھی کوئلہ کان میں کام نہیں کرسکیں گے۔

چیف مائنز انسپکٹر بلوچستان نے کہا کہ 17 سال کے جوان شخص کو 24 گھنٹے میں 12 گھنٹے آرام دینا لازمی ہوگا۔

چیف مائنز انسپکٹر نے مزید بتایا کہ اب محکمہ معدنیات کے انسپکٹر کے علاوہ محکمہ سماجی بہبود ، محکمہ لیبر اور ضلعی انتظامیہ وپولیس بھی کوئلہ کان کا معائنہ کریں گے اور دوران چیکنگ قوانین کی خلاف ورزی پر مائن مینیجر، ٹھیکیدار کو گرفتار کیا جاسکتا ہے۔